सर्वोच्च अदालतले सरकारका नाममा कोरोनाभाइरसको महामारी फैलिएका देशबाट आफ्ना नागरिकलाई तत्काल फिर्ता ल्याउने आवश्यक व्यवस्था गर्न अन्तरिम आदेश जारी गरेको छ । अधिवक्ता सोमप्रसाद लुइटेल सहितले दायर गरेको रिटमा न्यायाधीश सपना प्रधान मल्लको एकल इजलाशले यस्तो आदेश जारी गरेको हो ।
सर्वोच्चले कोरोनाभाइरसको महामारी फैलिएपछि अन्य मुलुकले आफ्ना नागरिकलाई विदेशबाट फर्काइरहेको र विदेशमा श्रम गर्ने नेपालीहरुको अवस्थाबारे प्रतिवेदन तयार गर्न र फिर्ता ल्याउनुपर्ने दबाबसमेत आएको हुनाले उचित व्यवस्थापन गरी फिर्ता ल्याउन आदेश गरेको हो।
“वैदेशिक रोजगारीमा रहेका अत्यन्त जोखिममा रहेका नेपाली नागरिकको अनियन्त्रित र अव्यवस्थित नेपाल प्रवेशबाट हुने थप जोखिमलाई संरक्षण गर्न, नागरिकको व्यक्तिगत अधिकार, बहुसंख्यक नागरिकाको जीवन स्वास्थ्य, सुरक्षाको हितलाई उनीहरुको उद्धार र फिर्ता ल्याउने कार्य गर्नुपर्ने देखिन्छ । उनीहरूलाई फिर्ता ल्याउनका लागि आवश्यक प्रशासनीक, आर्थिक र व्यवस्थापकीय पहल गर्नु,” ,’ सर्वोच्चद्वारा जारी अन्तरिम आदेशमा भनिएको छ ।
साथै सर्वोच्चले विश्व स्वास्थ्य संगठनको मापदण्ड बमोजिम भेदभावरहित स्वास्थ्य सेवा प्राप्त गर्ने व्यवस्था मिलाउन परराष्ट्रमार्फत् कूटनीतिक पहल गर्न समेत भनेकाे छ।